ಬಳ್ಳಾರಿ ಜೈಲಿನಲ್ಲಿರುವ ದರ್ಶನ್ ಕುರಿತ ಲೇಟೆಸ್ಟ್ ನ್ಯೂಸ್...

2024-09-08 05:58:17

ಬಳ್ಳಾರಿ/ಬೆಂಗಳೂರು, ಸೆ.8: ಚಿತ್ರದುರ್ಗದ ರೇಣುಕಾಸ್ವಾಮಿ ಕೊಲೆ ಪ್ರಕರಣದಲ್ಲಿ ಎ-2 ಆರೋಪಿಯಾಗಿ ಬಳ್ಳಾರಿ ಸೆಂಟ್ರಲ್ ಜೈಲಿನಲ್ಲಿ ನ್ಯಾಯಾಂಗ ಬಂಧನದಲ್ಲಿರುವ ನಟ ದರ್ಶನ್ ತೂಗುದೀಪ್ ಅವರು ನಾಳೆ ಸೋಮವಾರ ಬೆಂಗಳೂರಿನಲ್ಲಿ ಜಾಮೀನು ಕೋರಿ ಕೋರ್ಟಿಗೆ ಅರ್ಜಿ ಸಲ್ಲಿಸುವ ಸಾಧ್ಯತೆ ಇದೆ. ಈಗಾಗಲೇ ಬಳ್ಳಾರಿ ಜೈಲಿಗೆ ಬಂದು ದರ್ಶನ್ ಅವರ ಸಹಿ ಪಡೆದು ಕೋರ್ಟಿಗೆ ಜಾಮೀನು ಅರ್ಜಿ ಸಲ್ಲಿಸಲು ಪತ್ನಿ ವಿಜಯಲಕ್ಷ್ಮಿ ಮುಂದಾಗಿದ್ದಾರೆ. ಮೂಲಗಳ ಪ್ರಕಾರ ನಾಳೆ ಸೋಮವಾರ ಬೆಂಗಳೂರಿನಲ್ಲಿ ಕೋರ್ಟಿಗೆ ಅರ್ಜಿ ಸಲ್ಲಿಸುವ ಸಾಧ್ಯತೆ ಇದೆ. 

ಈಗಾಗಲೇ ಬಳ್ಳಾರಿ ಸೆಂಟ್ರಲ್ ಜೈಲಿನಲ್ಲಿ ಖೈದಿ ನಂ.511 ಆಗಿ ಸಾಮಾನ್ಯ ಖೈದಿಗಳಂತೆ ಸೆಲ್ ನಲ್ಲಿ ಬಂಧಿಯಾಗಿರುವ ದರ್ಶನ್ ಅವರು ಟಿವಿ ಸೌಲಭ್ಯವನ್ನು ಕೇಳಿ ಪಡೆದಿದ್ದಾರೆ. 5 ದಿನಗಳ ನಂತರ ರಿಪೇರಿ ಆಗಿರುವ ಟಿವಿಯೊಂದನ್ನು ದರ್ಶನ್ ವೀಕ್ಷಣೆಗೆ ಅವರ ಸೆಲ್ ನಲ್ಲಿ ಇಡಲಾಗಿದೆ. ಜೊತೆಗೆ ದರ್ಶನ್ ಕೇಳಿದ್ದಂತೆ ಈಗ ಸೆಲ್ ನಲ್ಲಿ ಕೇಳಿದ್ದ ಪುಸ್ತಕಗಳನ್ನು ಕೂಡ ಕೊಡಲಾಗಿದೆ. ಆದರೆ ದರ್ಶನ್ ಕೇಳಿದ್ದ ಮೊಬೈಲ್ ಮಾತ್ರ ಇನ್ನೂ ಸಿಕ್ಕಿಲ್ಲ. ಸದ್ಯ ದರ್ಶನ್ ಅವರು ಪತ್ನಿ ವಿಜಯಲಕ್ಷ್ಮಿ ಅವರಿಗೆ ಜೈಲಿನ ಫೋನ್ ಬೂತ್ ನಿಂದ ಕರೆ ಮಾಡುತ್ತಿದ್ದಾರೆ. ಆದರೆ ಜೈಲಿನ ನಿಯಮಗಳ ಪ್ರಕಾರ ಪ್ರತಿ ದಿನ ಕೇವಲ 5 ನಿಮಿಷಗಳ ಕಾಲ ಮಾತ್ರ ತಮ್ಮ ಇಚ್ಛೆಯ 3 ನಂಬರ್ ಗಳಿಗೆ ಮಾತ್ರ ದರ್ಶನ್ ಕರೆ ಮಾಡಬಹುದಾಗಿದೆ. 
ಆದರೆ ದರ್ಶನ್ ಬೆಂಗಳೂರಿನ ಪರಪ್ಪನ ಅಗ್ರಹಾರ ಜೈಲಿನಲ್ಲಿದ್ದಾಗ ಕೇಳುತ್ತಿದ್ದ ಮನೆ ಊಟ ಮಾತ್ರ ಇನ್ನೂ ಸಿಕ್ಕಿಲ್ಲ. ಈಗಾಗಲೇ 2 ಬಾರಿ ಮನೆ ಊಟದ ಅರ್ಜಿಗಳನ್ನು ಕೋರ್ಟ್ ತಿರಸ್ಕರಿಸಿದೆ. ಇಷ್ಟಾದರೂ ದರ್ಶನ್ ಮತ್ತೆ ಬಳ್ಳಾರಿ ಸೆಂಟ್ರಲ್ ಜೈಲಿನಲ್ಲಿಯೂ ಮನೆ ಊಟ ಬೇಕೆಂದು ಕೋರ್ಟಿಗೆ ಅರ್ಜಿ ಸಲ್ಲಿಸಲು ಮುಂದಾಗಿದ್ದಾರೆ.

ಗಣೇಶನ ದರ್ಶನ ಭಾಗ್ಯ ದರ್ಶನ್ ಗಿಲ್ಲ!

ನಟ ದರ್ಶನ್ ತೂಗುದೀಪ್  ಬಳ್ಳಾರಿ ಸೆಂಟ್ರಲ್ ಜೈಲಿನಲ್ಲಿ ನಿನ್ನೆ ಶನಿವಾರ ಗಣೇಶ ಹಬ್ಬ ಆಚರಣೆ ಮಾಡಲಾಗಿದೆ. ಆದರೆ ದರ್ಶನ್​ಗೆ ಮಾತ್ರ ಗಣೇಶನ ದರ್ಶನದ ಭಾಗ್ಯ ದೊರೆತಿಲ್ಲ. ಆದರೆ ದರ್ಶನ್ ಅವರಿಗೆ ಗಣೇಶನ ಹಬ್ಬದ ಪ್ರಸಾದ ಮಾತ್ರ ಸಿಕ್ಕಿದೆ.